Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясы Т.Океев атындагы “Кыргызфильм” улуттук киностудиясы  менен биргеликте уюштурган "Мамлекеттик тилди даңазалаган социалдык видеороликтер" сынагынын  экинчи этабы жыйынтыкталды.

Сынак Кыргыз Республикасынын Конституциялык мыйзамына жана Кыргыз Республикасынын Өкмөтүнүн 2020-жылдын 1-октябрындагы №510 токтому менен бекитилген Кыргыз Республикасында 2021–2025-жылдары мамлекеттик тилди өнүктүрүү жана тил саясатын өркүндөтүү программасынын алкагында өткөрүлдү.

Сынактын максаты:

Бул сынак мамлекеттик тилди даңазалоо, аны колдонуу жана өнүктүрүү, ошондой эле мамлекеттик тил аркылуу Кыргыз Республикасынын бардык этносторунун биримдигин чыңдоо максатын көздөдү.

Сынактын жүрүшү:

2024-жылдын 13-ноябрынан 2025-жылдын 28-январына чейин сынакка жалпы 14 социалдык видеоролик келип түшкөн. Алардын ичинен 12 видеоролик эксперттик кароодон өтүп, 2025-жылдын 30-январынан тарта 15 күн бою коомчулукка жайылтылды.

Жеңүүчүлөрдү аныктоо үчүн түзүлгөн атайын комиссия 2025-жылдын 14-февралында жыйын өткөрүп, мыкты деп табылган чыгармаларды аныктады.

Жеңүүчүлөр:

🥇 1-орун – “Сүйлө” (Four Frames KG чыгармачыл тобу)

🥈 2-орун – “Мен сени сүйөм, кыргыз тилим!” (Байзак Маматалиев)

🥉 3-орун – “Комуз” (“Эл фильм” чыгармачыл тобу)

🥉 3-орун – “Кыргызстан” (Алмаз Токтоев)

Кызыктыруучу сыйлыктар:

🏅 “Мурас” – Асел Умаралиева

🏅 “Жолугушуу” – Эрлан Өмүрбеков

🏅 “Кыргызча кандай болот?” – “Азем” чыгармачыл тобу

Сынактын жобосуна ылайык жеңүүчүлөр төмөнкү сыйлыктар менен сыйланды:

🏆 1-орун – Диплом жана 500 000 сом

🥈 2-орун – Диплом жана 300 000 сом

🥉 3-орун – Диплом жана 200 000 сом

Ошондой эле, көрүүчүлөрдүн сүймөнчүлүгүнө ээ болгон эмгектер үчүн 500 000 сомдук кызыктыруучу сыйлык фонду каралып, жалпы байге фонду 1,5 млн сомду түздү.