Бүгүн 20-февралда, Мамлекеттик тил жана тил саясаты боюнча улуттук комиссиянын төрагасы Мелис Мураталиев, Билим берүү жана илим министринин орун басары Надира Джусупбекова, Маданият, маалымат, жана жаштар саясаты министринин орун басары Марат Тагаев ошондой эле бир катар агартуу тармагынын өкүлдөрү, эксперттердин катышуусунда PeaceNexus фонду тарабынан уюштурулган “Кыргыз жараны” концепциясын ишке ашыруу боюнча илимий изилдөөлөрдүн жыйынтыктары жана актуалдуу маселелерди талкуулоо боюнча кереге кеңеш өттү.
Улуттук комиссиянын төрагасы Мелис Мураталиев “Кыргыз жараны” концепциясы өлкөбүздүн ар бир жаранына таандык болгон жалпы баалуулуктарды жайылтып, биримдикти бекемдөөгө багытталган. Мамлекеттик тил бул жараянда негизги курал болуп саналат", - деп белгиледи.
Ал эми Кыргызстандагы PeaceNexus Фондунун директору Чинара Эсенгул этностордун өздүгүн, баалуулуктарын изилдеп, мамлекеттик тилди биримдиктин куралы катары колдонуу жолдорун талдап чыгуу менен катар, аталган изилдөөлөр келечекте конкреттүү чечимдерди кабыл алууга жардам берерине токтолду.
Иш-чарада мамлекеттик тилдүү эмес мектептерде мамлекеттик тилди үйрөтүүдөгү көйгөйлөр жана мүмкүнчүлүктөр, кыргыз жарандарынын дунган, өзбек жана уйгур этникалык топторунун өздүгүн изилдөөнүн жыйынтыктары, жарандык идентификацияны калыптандырууда этностордун өзгөчөлүгүн сактоо жана мамлекеттик тилди өнүктүрүү багытындагы маселелер талкууланды.
Иш-чаранын жүрүшүндө катышуучулар этникалык ар түрдүүлүктү сактоо менен бирге, бирдиктүү кыргыз жарандыгын калыптандыруу боюнча ар тараптуу ой-пикирлерди жана практикалык сунуштарды ортого салышты.
Мындан сырткары этностор аралык мамилелерди чыңдоо, мамлекеттик тилди биримдиктин жана толеранттуулуктун куралы катары колдонуу жолдоруна өзгөчө көңүл бурулду.
Катышуучулар мектептерде мамлекеттик тилди үйрөтүүдө жолугуп жаткан кыйынчылыктарды белгилеп, бул багытта жаңы ыкмаларды киргизүү зарыл экенин айтышты. Ошондой эле, этникалык топтордун өздүгүн сактоо менен жарандык идентификацияны калыптандыруунун мааниси баса белгиленди.
