Бүгүн 21-февралда, Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын Кеңешме органынын кезектеги жыйыны өтүп, күн тартибинде төмөнкү маселелер каралды.

Жыйындын негизги темалары төмөнкүлөр болду:

         1.      Орфография жана орфоэпия маселелери боюнча эксперттик топ түзүү:

Кыргыз тилинин жазуу жана айтылыш эрежелерин тактоо, өркүндөтүү максатында эксперттик (жумушчу) топ түзүү сунушталды. Бул кадам тилдин грамматикалык жана лексикалык нормаларын заманбап талаптарга ылайык келтирүүгө багытталган.

         2.      Транслитерация эрежелерин иштеп чыгуу:

«Кыргыз Республикасынын мамлекеттик тили жөнүндө» Кыргыз Республикасынын конституциялык Мыйзамынын 11-беренесине ылайык, кыргыз тилинин жазуу тамгаларынын транслитерациясын колдонуу эрежелерин бекитүү зарылдыгы белгиленди. Бул эрежелер мамлекеттик тилдин ар түрдүү тармактарда бирдей колдонулушун камсыздоого өбөлгө түзөт.

         3.      2026-2028-жылдарга мамлекеттик тилди өнүктүрүү Программасына сунуштарды берүү:

2021-2025-жылдары ишке ашып жаткан тилди өнүктүрүү Программасынын мөөнөтү аяктап жаткандыгына байланыштуу, жаңы 2026-2028-жылдарга карата мамлекеттик программаны иштеп чыгуу жана сунуштарды берүү маселеси талкууланды.

Жыйында ошондой эле күн тартибинен тышкары актуалдуу маселелер каралды.

Мамлекеттик тилди өнүктүрүүдө улуттук маданиятты, улуттун аң-сезимин бекемдөөнүн башкы шарттарынын бири экенин эске алып, Кеңешме орган өз ишин тынымсыз улантат.

#мамтил #кыргызтил #тилсаясаты #кеңешмеорган