2025-жылдын 25-февралында, Мамлекеттик тил жана тил саясаты боюнча улуттук комиссия тарабынан Бишкек шаарынын мэриясынын мамлекеттик тилди өнүктүрүү бөлүмүнүн, Билим берүү департаментинин өкүлдөрүнүн, райондук билим берүү башкармалыктарынын жетекчилери, бала бакчалардын директорлорунун катышуусунда мектепке чейинки билим берүү уюмдары үчүн ЭТНОСТЕМ (ЭтноSTEAM) багытындагы мультистудия комплектисинин таанытымы өттү.

Долбоордун негиздөөчүсү Солдатбек Рысбек уулу ЭТНОСТЕМ мультистудия комплектисинин мүмкүнчүлүктөрүн тааныштырып, анын балдардын чыгармачылык жана интеллектуалдык өнүгүүсүнө тийгизген таасири тууралуу кеңири айтып берди.

Төрага Мелис Мураталиев “Ар бир бала бакча ушундай ЭТНОСТЕМ мультистудия комплектиси менен жабдылышы керектигин, улуттук баалуулуктарды заманбап билим берүү технологиялары менен айкалыштыруу аркылуу, жаңы муунду кыргыз тилинде эркин сүйлөгөн, чыгармачыл жана креативдүү инсан катары тарбиялоого болоорун”, - белгиледи.

Эскерте кетсек, пилоттук долбоор катары Мамлекеттик тил жана тил саясаты боюнча улуттук комиссия тарабынан Москва районунун 15 бала бакчасына ЭТНОСТЕМ мультистудия комплектиси алынып берилген. Мындай тажрыйба долбоордун натыйжалуулугун көрсөтүп, анын башка аймактарда дагы жайылтылышына жакшы негиз болууда.

Иш-чаранын соңунда катышуучуларга комплексти колдонуу боюнча практикалык көрсөтмөлөр уюштурулуп, тажрыйба алмашуу мүмкүнчүлүгү түзүлдү.