«Кыргызстан улуттук электр тармагы» ААКнын жыйындар залында Кыргыз Республикасынын Президентинин Указы менен кабыл алынган «Улуттук дем – дүйнөлүк бийиктик» Уңгужолун тааныштыруу иш-чарасы болуп өттү.
Иш-чарага Мамлекеттик тил жана тил саясаты боюнча улуттук комиссиянын төрагасы Мелис Мураталиев, «Кыргызстан улуттук электр тармагы» ААКтын башкы директорунун орун басары Ильгиз Сыдыгалиев жана компаниянын кызматкерлери катышты.
Уңгужолдун негизги багыттары үй-бүлө, коом жана мамлекет деген үч башатка таянат. Мелис Мураталиев иш-чара учурунда бул концепциянын маанисине токтолуп, мындай деп белгиледи: “Ар бир үй-бүлө — бул мамлекеттин пайдубалы. Улуттук демди ойготуу, мекенчилдикти күчөтүү жана жоопкерчиликти жогорулатуу үчүн ар бирибиз өзүбүздөн башташыбыз керек. Бул уңгужол бизге жарандык жоопкерчиликти, нарктуу жашоону жана биримдикти үйрөтөт.”
2024-жылдын 18-декабрында Президент Садыр Жапаров кол койгон «Улуттук дем – дүйнөлүк бийиктик» уңгужолу идеологиялык негиздерди жана өлкөнүн узак мөөнөттүү өнүгүүсүн камсыз кылуу боюнча стратегиялык багыттарды камтыйт. Документтин башкы максаты — мамлекеттик, коомдук-саясий жана жарандык институттардын ишин бир нукка салуу менен нарктуу, мекенчил жана жоопкерчиликтүү жарандарды калыптандыруу, кубаттуу мамлекетти куруу.
«Кыргызстан улуттук электр тармагы» ААКтын бардык филиалдарында — электр тармактарынын ишканаларында да ушул сыяктуу иш-чаралар уюштурулуп, кызматкерлерге Уңгужолдун мааниси жеткирилүүдө. Ильгиз Сыдыгалиев энергетика тармагы өлкөнүн экономикалык коопсуздугунун жана социалдык туруктуулугунун негизи экенин белгилеп: “Биздин милдет — өлкөнүн жарык маанайын камсыз кылуу гана эмес, мекенге болгон сүйүүнү жана жоопкерчиликти ар бир ишибизден көрсөтүү. Улуттук дем бизди алдыга сүрөп, дүйнөлүк бийиктиктерди багындырууга дем берет,” - деп билдирди.
«Улуттук дем – дүйнөлүк бийиктик» уңгужолу өлкөнү өнүктүрүүнүн маанилүү концепциясы гана болбостон, ар бир кыргызстандык үчүн жашоо образына айлануусу кажет. Үй-бүлөдөн, иштен, коомдон башталган бул дем мамлекетибизди дүйнөлүк аренада жаңы бийиктиктерге жеткирери талашсыз.
