27-февралда, Ош шаарындагы Бабур атындагы Ош мамлекеттик академиялык өзбек музыкалык драма театрында "Кыргыз Таануу" окуу-курсунун жана Эл аралык эне тил күнүнө карата 10 күндүктүн жыйынтыкталуусу боюнча иш-чара өткөрүлдү. Бул иш-чара Ош мамлекеттик педагогикалык университети, Ош шаарынын мэриясы жана Мамлекеттик тил жана тил саясаты боюнча улуттук комиссиянын демилгеси менен уюштурулду.

Иш-чарага Мамлекеттик тил жана тил саясаты боюнча улуттук комиссиянын төрагасы Мелис Мураталиев, Ош шаарынын мэринин орун басары Нурбек Кадыров, жогорку окуу жайларынын жетекчилери, окутуучулар жана студенттер катышты.

Иш-чаранын башында Ниязалы атындагы Ош мамлекеттик музыкалык окуу жайы, ОшМУ, ОшТУ жана ОшМПУ сыяктуу жогорку окуу жайларынын таланттуу студенттери тарабынан дүйнө элдеринин улуттук бийлери жана обондору көрсөтүлдү. Ошондой эле, кыргыз тилинин өнүгүшүнө зор салым кошкон бир катар мамлекеттик кызматкерлер жана окутуучулар Ош шаарынын мэриясы менен Мамлекеттик тил жана тил саясаты боюнча улуттук комиссиянын Ардак грамоталары жана ыраазычылык баракчалары менен сыйланышты.

Экинчи бөлүктө Мамлекеттик тил жана тил саясаты боюнча улуттук комиссиянын төрагасы Мелис Мураталиев "Кыргыз Таануу" сабагынын негизинде семинар өткөрдү. Семинарда төрага, катышуучуларды кыргыз тилинин санарип айдыңында жүрүп жаткан өнүгүү процесстеринен кабардар кылып, "Кыргыз элинин окутулбаган тарыхы" боюнча баяндама жасады. Ал 201-жылы Модэ (Маодунь) тарабынан Чыгыш Тянь-Шанда жайгашкан Гэгунь (Кыргыз) ээлигинин баш ийдирилгенден тартып, кыргыз тарыхынын маанилүү учурларын жана улут катары калыптануу жолдорун талдады. Ошондой эле, кыргыздын каада-салттары жана алардын чечмелениши боюнча кеңири маалымат берилди.

Иш-чара жогорку маанайда жыйынтыкталып, кыргыз тилинин өнүгүүсү жана улуттук идентификацияны чыңдоодо маанилүү кадамдар аткарылгандыгы белгиленди.