Токмок шаардык кеңешинин депутаттарынын демилгеси менен мамлекеттик тилди өнүктүрүү жана улуттук маданий баалуулуктарды жайылтуу максатында “Кыргыз таануу” сабагы өттү.

Иш-чарага Мамлекеттик тил жана тил саясаты боюнча улуттук комиссиянын төрагасы Мелис Мураталиев, Токмок шаардык депутаттар кеңешинин төрагасы Исаев Чынгыз, Токмок шаарынын мэринин орун басары Рысбаева Аида, шаардык депутаттар, мамлекеттик жана муниципалдык мекемелердин өкүлдөрү, ошондой эле мугалимдер катышты.

Төрага Мелис Мураталиев өзүнүн сөзүндө мамлекеттик тилдин өлкөнүн социалдык жана маданий турмушундагы ордуна токтолуп, тилдин ар бир кыргыз жараны үчүн маанилүүлүгүн баса белгиледи: “Мамлекеттик тил — бул мамлекеттин күзгүсү, улуттук аң-сезимдин негизи. «Кыргыз таануу» сабагы аркылуу биз жаштарга кыргыз элинин бай тарыхын, баалуулуктарын жеткирип, улуттук ар-намысты жана патриоттуулукту бекемдейбиз. Кыргыз элинин мурасы -  бул биздин тарыхый тамырыбыз, аны билүү жана урматтоо ар бир жарандын ыйык милдети”, -  деп билдирди ал.

Улуттук комиссиянын төрагасы ошондой эле мамлекеттик тилди жайылтууда билим берүү мекемелеринин ролу чоң экенин белгилеп, жергиликтүү бийлик, педагогдор жана жарандык коом менен биргеликте иш алып баруу зарыл экенин кошумчалады.

«Кыргыз таануу» сабагынын негизги максаты — мамлекеттик тилди жайылтуу, жаштарга улуттук каада-салттарды, кыргыз элинин тарыхын жана маданий мурастарын үйрөтүү. Лекциялык форматта өткөрүлгөн сабакта катышуучулар кыргыз элинин тарыхый инсандары, элдик эпостор, каада-салттар жана улуттук маданият тууралуу кеңири маалымат алышты.

Токмок шаардык депутаттар кеңешинин төрагасы Исаев Чынгыз жана мэрдин орун басары Рысбаева Аида өз сөздөрүндө мамлекеттик тилди өнүктүрүү боюнча иш-чараларды колдоого даяр экендиктерин билдиришти.

“Биздин максат - жаштарды мамлекеттик тилде эркин сүйлөп, жаза билүүгө үйрөтүү гана эмес, алардын жүрөгүндө улуттук аң-сезимди жана мекенчилдикти калыптандыруу. «Кыргыз таануу» сабагы дал ушул максаттарды жүзөгө ашырууга өбөлгө түзөт”, -  деп белгиледи Исаев Чынгыз.

Иш-чаранын жыйынтыгында бардык катышуучулар “Кыргыз таануу” сабагы мамлекеттик деңгээлде колдоого муктаж экенин белгилешти. Бул сабактын үзгүлтүксүз өткөрүлүшү жаштардын мамлекеттик тилди терең үйрөнүүсүнө жана улуттук аң-сезимдин жогорулашына чоң салым кошору айтылды.

Мындай иш-чаралар мамлекеттик тилдин кадыр-баркын көтөрүүгө, кыргыз элинин маданий жана руханий мурастарын сактоого олуттуу негиз түзөт.