Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын Окуу-маалыматтык жана котормо борбору тарабынан “Чет элдик жарандарга мамлекеттик тилди үйрөтүү маселелери жана келечеги” аталышындагы эл аралык илимий-тажрыйбалык конференция өткөрүлдү.
Конференциянын максаты – Токио университетинин Борбордук Евразия боюнча адиси, изилдөөчү, Жапон-Кыргыз маданий изилдөө уюмунун жарчысынын башкы редактору, ф.и.д. Акматалиева Жакшылык Букарбековна менен жолугушуу жана жапон улутундагы кыргыз тилин үйрөнүүчүлөргө арналган “Кыргыз тилин үйрөнөбүз” китебинин бет ачарын өткөрүү. Буга катар Кыргызстандагы ЖОЖдордо окуган чет элдик жарандарга кыргыз тилин үйрөтүү боюнча натыйжалуу ыкмалар менен бөлүшүү, илимий баяндамаларды жасоо, тажрыйба алмашуу.
Конференция 2 багытта иш алып барды:
1. Токио чет тилдер университетинин окутуучусу, филология илиминин доктору, “Кыргыз тилин үйрөнөбүз” китебинин автору Акматалиева Жакшылык Букарбековна менен жолугушуу жана “Кыргыз тилин үйрөнөбүз” китеби боюнча маалымат берилди;
2. Кыргызстанда жашап жаткан чет элдик жарандардын кыргыз тилин өздөштүрүүсү жана изилдөөлөрү.
Иш-чаранын жүрүшүндө Токио университетинин Борбордук Евразия боюнча адиси, изилдөөчү, Жапон-Кыргыз маданий изилдөө уюмунун жарчысынын башкы редактору, ф.и.д. Акматалиева Жакшылык Букарбековна “Жапониядагы кыргыз тилин чет тил катары окутуунун методологиясы” деген илимий баяндама жасап, “Кыргыз тилин үйрөнөбүз” китеби боюнча кеңири маалымат берди. Чет мамлекеттин жараны катары Кыргыз-Түрк Манас университетинин аспиранты Пак Сола “Чет элдиктер үчүн кыргыз тилин үйрөнүүнүн пайдалуу жактары” баяндамасында кыргыз тилин үйрөтүүнүн пайдалуу жактарына өзгөчө токтолуп, кыргыз тилин сүйүп, өтө кызыгып үйрөнгөнүнө токтолду.
Ал эми Борбордук Азиядагы Америка университетинин ага окутуучусу, Кыргызча оңой долбоорунун жетекчиси Данияр Карабаев “Кыргызча оңой - мобилдик колдонмонун тажрыйбасы” баяндамасында кыргыз тилин кызыктуу жана жеңил үйрөнүүгө багытталган мобилдик колдонмонун учурда берген натыйжасына токтолуп, тил үйрөнүүчүлөрдү мамлекеттик тилди жеңил үйрөнүүгө чакырды. Буга улай Эл аралык жогорку медициналык мектебинин чет элдик байланыштар бөлүмүнүн башчысы ф.и.к., доцент Карагулова Махабат Керимбековна “Жасалма интеллект аркылуу чет элдик жарандарга мамлекеттик тилди өз алдынча үйрөнүү ыкмалары” баяндамасын кыргыз жана англис тилинде баяндап, жасалма интеллекттин эффективдүү жактарын белгиледи. Ал эми – Кыргыз-Түрк “Манас” улук окутуучусу, п.и.к. Ибраева Мира Эсенбековна учурдагы эң керектүү окуу куралдары болуп эсептелген “Алтын көпүрө” китебинин жардамы менен чет элдик студенттерге кыргыз тилин үйрөтүү маселелерине кеңири токтолуп, жакшы өздөштүрүп чыккан башка улуттун студенттерин да сөз берди. Мындан тышкары чет элдик студенттерге сабак берген жеке окуу жайлардын окутуучулары да кыргыз тилин чет элдиеткрге үйрөтүү боюнча тажрыйба бөлүштү. Конференцияга жапон, корей, түрк, индус, паистан, орус, татар, өзбек, казак улуттун өкүлдөрү менен катар Кыргызстан Ассамблеясынын жооптуу катчысы В.Насирова, “Кыргыз конгресси” ассоциасынын төрагасы К.Култаев, Азербайжан улутунун “Бирлик” коомдук бирикмесинин төрагасы Х.Бахшалиев, Рудаки ат.тажик улутунун коомдук бирикмесинин торагасынын орун басары К.Муриватов да катышты. Конференцияда мамлекеттик тилди үйрөтүүдөгү натыйжалуу ыкмалар, айрыкча чет элдик жарандарга кыргыз тилин үйрөтүү өзгөчөлүктөрү боюнча баяндамалар, талкуулар болуп өттү.
