Ак калпак күнүнө карата Мамлекеттик тил жана тил саясаты боюнча улуттук комиссиянын төрагасы Мелис Мураталиевдин куттуктоосу

Урматтуу мекендештер!

Сиздерди 5-март – Ак калпак күнү менен чын жүрөктөн куттуктайм!

Ак калпак – кыргыз элинин улуттук баалуулуктарынын, дөөлөт мурасынын жана эркиндикти сүйгөн мүнөзүнүн символу. Бул күн ата-бабаларыбыздын нарк-насилин, маданиятын жана өзгөчө улуттук демин даңазалаган маанилүү майрамдардын бири болуп калды.

Ар бир кыргыз жигити үчүн ак калпак жөн гана баш кийим эмес, элибиздин ар-намысын, улуулугун жана тектүүлүгүн туюнткан белги. Аны кийип жүрүү – чоң жоопкерчилик, ата-бабалардын осуятын ардактоо жана мекенге болгон сый-урматты көрсөтүү.

Биз улуттук баалуулуктарыбызды урматтап, даңазалоо менен бирге, мамлекетибиздин өнүгүүсүнө жана тилибиздин өсүп-өркүндөшүнө өз салымыбызды кошушубуз керек.

Ак калпактай бийик ой-максаттарга умтулуп, улуттук демибиз менен дүйнөлүк бийиктиктерди багынталы!