Мамлекеттик тил мыйзамын аткаруу боюнча жумушчу жыйын өттү

Юстиция министрлигинде Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитети, КР Президентине караштуу Мамлекеттик тил жана тил саясаты боюнча улуттук комиссиясы менен биргелекте “Кыргыз Республикасынын мамлекеттик тили жөнүндө” конституциялык Мыйзамынын мамлекеттик органдарда аткарылышын контролдо боюнча жумушчу тобу менен жыйын болуп өттү.


Министрликтен маалымат алуу үчүн жумушчу топтун төрайымы Г.А. Кожокулова менен Улуттук комиссиянын төрагасынын орун басары К.Ш. Сейталиев жана жумушчу топтун мүчөлөрү катышты..

Жумушчу топтун жыйынын Юстиция министринин орун басары О.К. Сыдыков ачып, министрликте мамлекеттик тилди өнүктүрүүгө байланыштуу иш-аракеттер үзгүлтүксүз жүргүзүлүп жаткандыгын мыйзамды аткаруу жана мамлекеттик тилди өнүктүрүү максатында Министрлик тарабынан атайын буйрук чыкканын белгиледи.

Маалыматка ылайык Юстминде мамлекеттик тилде иш алып баруунун пайыздык көрсөткүчү бүгүнкү күндө 60 % түздү, бул көрсөткүч 2022-жылы 8% гана түзгөн. Бул статистикалык маалымат ушул жылдын акыркы 2 айында Министрликтин чыгыш каттарынын сандык көрсөткүчү менен аныкталды.

Анда 2025-жылдын январь айынан март айына чейинки аралыкта 1275 документ расмий тилде, ал эми 1500 документ мамлекеттик тилде түзүлгөн.

Мындан сырткары Министрликтин кызматкерлери мамлекеттик тилди билүү деңгээли боюнча жыл сайын “Кыргызтест” мамлекеттик мекемесинин атайын тестирлөөсүнөн өтүп турат. Мында Министрликтин борбордук аппаратынан 99, аймактар аралык бөлүмдөрдөн 34, Пробация департаментинен 166, Юридикалык жардам көрсөтүү кызматынан 5 жана Соттук-эксперттик кызматынан 5 адам өтүп, жалпы 309 адам мамлекеттик тилди билүү деңгээлинин сертификаттарына ээ болгон.

Мындан тышкары, Улуттук тил комиссиясы тарабынан уюштурулган “Кыргыз Республикасынын мамлекеттик тили жөнүндө” мыйзамынын кабыл алынгандыгынын 35 жылдыгына арналган сынакка Юстиция министрлигине караштуу Кайтаруу жана конвой менен коштоп жүрүү кызматы катышып, эки жолу байгелүү орунга ээ болуп, атайын диплом менен сыйланды.

Юстиция министрлиги мындан ары да КР Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин Регламенти боюнча комитети жана КР Президентине караштуу мамлекттик тил жана тил саясаты боюнча улуттук комиссиясы менен биргелекте “Кыргыз Республикасынын мамлекеттик тили жөнүндө” Конституция мыйзамынын аткарылышын бекемдөө менен жалпы ченемдик укуктук актыларга юридикалык баа берүүнүн ченемедерин иштеп чыгуу боюнча иш алып барууга даяр экендигин билдирди.

Архив