Бүгүн 14-мартта Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясынын борбордук аппаратынын, Улуттук комиссияга караштуу Кыргыз энциклопедия жана терминология борборунун, Окуу-маалыматтык жана котормо борборунун, «Кыргыз тили» гезитинин редакциясынын кызматкерлери “Ата-Бейит” Улуттук-тарыхый мемориалдык комплексине эскерүү сапарын уюштурушту.

Бул иш-чара Кыргыз Республикасынын Президентинин 2024-жылдын 24-июлундагы №205 Жарлыгын ишке ашыруу максатында кыргыз мамлекеттүүлүгүн түптөгөн инсандар – Абдыкерим Сыдыков, Иманалы Айдарбеков, Жусуп Абдрахманов, Абдыкадыр Орозбеков жана Ишеналы Арабаевдин тарыхтагы ордун дагы бир жолу эске салды.

Сапар мемориалдык комплекске гүлчамбар коюу жана куран окуу менен башталып, “Ата-Бейит” Улуттук-тарыхый мемориалдык комплексинин директору, тарых илимдеринин доктору Абдрахманов Болотбек Джумашович сөз сүйлөп, репрессия жылдарындагы тарыхый окуяларга токтолуп, мемориалдык комлексти куруудагы алгачкы жылдарга токтолуп, андан бери комплекстин илимий изилдөө борбору тарабынан дагы архивтик материалдар табылып, облус аймактарынан да маалыматтар чогулуп, өзүнчө энциклопедия болуп даярдалып жаткандыгын, маалыматтар дагы да актуалдуу экендигин айтып өттү.

Ошондой эле, “Ата-Бейит” УТМКнын илимий бөлүм башчысы, тарых илимдеринин кандидаты, доцент Асекова Салтанат Урумовна тематикалык баяндама жасап, репрессияланган аялдардын таржымалы тууралуу кеңири маалымат берди.

Төрага Мелис Мураталиев Кыргыз мамлекеттүүлүгүнүн пайдубалын түптөгөн инсандарды унутпай, алардын эмгегин эскерип, жаңы муундун тарыхка болгон кызыгуусун арттырууга мүмкүнчүлүк түзүп жаткан мемориялдык комплекстин жамаатына ыраазычылык билдирип, Улуттук комиссия тарабынан чыгарылган энциклопедиялык китептердин томдуктарын мемориалдык комплекске тапшырды.

Иш-чаранын жүрүшүндө катышуучулар “Ата-Бейит” мемориалдык комплексин кыдырып, экскурсияда мамлекеттүүлүктү түптөгөн аталардын тарыхы, алардын эмгеги тууралуу маалымат алышты.

Эскерүү иш-чарасы эртең, 15-мартта белгилене турган Аталар күнү менен айкалыштырылып, бул күндүн маани-маңызын терең түшүнүүгө мүмкүнчүлүк берди. Кыргыз мамлекеттүүлүгүн түптөгөн улуу инсандардын тарыхый эмгеги – биздин улуттук дөөлөтүбүз, алар баштаган асыл жол эч качан унутулбашы керек.

Өткөндү эстөө – келечекти бекемдөө. Аталардын арбагына таазим этип, муундан-муунга алардын осуятын жеткирүү – ар бир кыргыз жаранынын ыйык милдети.