Ленин районунун Билим берүү башкармалыгынын уюштуруусунда 2025-жылдын март айында Кыргыз поэзиясынын алпы, улуу акын Алыкул Осмоновдун 110 жылдыгына арналган кароо-сынак өткөрүлдү.

Иш-чаранын негизги максаты – улуу акындын чыгармаларын даңазалоо, окуучулардын көркөм өнөргө, адабиятка болгон кызыгуусун арттыруу жана мугалимдердин чыгармачылык потенциалын колдоо болду.

Кароо-сынак үч номинация боюнча өттү:

1. Көркөм окуу сынагы

Алыкул Осмоновдун терең философиялуу, жүрөккө жеткен ырларын көркөм окуу сынагына 98 окуучу катышты. Алар акындын чыгармаларын жан дили менен окуп, ар бир сапты жүрөк толкундоосу менен жеткирүүгө аракет кылышты. Калыстар тобу катышуучулардын көркөм окуу чеберчилигине, текстти түшүнүү жана сезим менен берүү жөндөмүнө баа беришти. Натыйжада, өзгөчөлөнгөн окуучулар байгелүү орундарга ээ болушту.

2. Окуучулар арасындагы обондуу ырлар сынагы

Алыкул Осмоновдун сөзүнө жазылган ырлар эл арасында кеңири таанымал. Бул сынакка 68 окуучу катышып, улуу акындын поэзиясын даңазалаган обондуу чыгармаларды аткарышты. Катышуучулар ырларды вокалдык мүмкүнчүлүктөрүнө жараша түрдүү ыкмада аткарып, көрүүчүлөргө унутулгус таасир калтыра алышты.

3. Мугалимдер арасындагы обондуу ырлар сынагы

Мугалимдер арасындагы сынак өзгөчө жылуу маанайда өттү. Сахнага 21 мугалим чыгып, Алыкул Осмоновдун ырларына жазылган чыгармаларды аткарышты. Сынак мугалимдердин чыгармачылык дараметин жана маданий мураска болгон сүйүүсүн дагы бир жолу далилдеди.

Бул иш-чара акындын керемет поэзиясын даңазалоо менен катар, катышуучуларга эсте каларлык чыгармачылык майрам тартуулап, мамлекеттик тилдин жаштар арасында жайылуусуна өбөлгө түздү.