Кыргыз Республикасынын Президентинин

2024-жылдын 18-декабрындагы ПЖ № 369 Жарлыгы

Улуттук комиссиянын кызматкерлерине “Улуттук дем – дүйнөлүк бийиктик” уңгужолу тааныштырылууда

Кыргыз Республикасынын Мамлекеттик тил жана тил саясаты боюнча улуттук комиссиясынын төрагасы Мелис Мураталиев Кыргыз Республикасынын “Улуттук дем – дүйнөлүк бийиктик” уңгужолун Улуттук комиссиянын борбордук аппаратынын жана түзүмдүк бөлүмдөрүнүн кызматкерлерине тааныштырып, анын мазмуну жана негизги багыттары тууралуу кеңири маалымат берди.

“Уңгужол – бул өлкөнүн өнүгүү багытын аныктаган идеологиялык негиз, стратегиялык көз караш, улуттук иденттүүлүктүн жана мамлекеттүүлүктүн негизи. Ал Кыргызстандын мамлекеттик саясатынын идеологиялык пайдубалы катары кызмат кылат. Бул документ – өлкөнүн тарыхый, маданий жана руханий мурастарына таянуу менен, улуттун азыркы жана келечектеги багытын аныктаган негизги концепция,” – деп белгиледи төрага.

“Улуттук дем – дүйнөлүк бийиктик” уңгужолунун негизги багыттары

• Мамлекеттүүлүктүн идеологиялык негиздери – Кыргыз мамлекетинин тарыхый жолун, маданий жана руханий баалуулуктарын сактоо жана өнүктүрүү.
• Улуттук биримдик жана тил саясаты – Кыргыз тилин мамлекеттүүлүктүн жана улуттук биримдиктин негизи катары өнүктүрүү жана коомдук турмуштун бардык чөйрөсүнө терең жайылтуу.
• Дүйнөлүк аренада улуттук аң-сезим – Глобалдашуу шартында кыргыз элинин өз алдынчалыгын сактап, дүйнөлүк коомчулукта татыктуу ордун табуусу.
• Илим, билим жана маданият – Улуттук билим берүү системасын өнүктүрүү, илимди жана инновацияны колдоо, улуттук маданиятты даңазалоо.
• Мекенчилдик тарбия – Кыргыз жаранынын аң-сезиминде мекенчилдикти жана мамлекеттик иденттүүлүктү чыңдоо.
• Мамлекеттик тилдин орду – Кыргыз Республикасынын символдорунун бири катары кыргыз тилин коомдун бардык катмарларында бекемдөө жана өнүктүрүү.

Мамлекеттик тил – уңгужолдун башкы багыты

• Кыргыз тили – улуттук иденттүүлүктүн жана мамлекеттүүлүктүн ажырагыс бөлүгү.
• Тил саясаты – улуттук идеологиянын негизги тирөөчү.
• Мамлекеттик тилди коомдун бардык тармактарына киргизүү – мамлекеттин башкы милдеттеринин бири.
• Кыргыз тилин коргоо эмес, аны реалдуу колдонуу – негизги максат.

“Мамлекеттик тилди өнүктүрүү, коомдук турмуштун бардык чөйрөсүндө колдонууну камсыз кылуу үчүн биргеликте иш алып барышыбыз керек. Уңгужолдо каралган тил саясаты – бул формалдуу милдет эмес, улуттун өнүгүүсүнүн кепилдиги. Биз эне тилибизди сактап, аны жаңы муундар үчүн да пайдалуу жана жашоого жөндөмдүү кылышыбыз керек,” – деп баса белгиледи Мелис Мураталиев.

Бул уңгужол мамлекеттик кызматкерлердин жана жалпы коомчулуктун улуттук аң-сезимин көтөрүүгө, Кыргызстандын туруктуу өнүгүүсүнө өбөлгө түзүүгө багытталган стратегиялык идеологиялык негиз болуп саналат.