2025-жылдын 26-мартында Кыргыз Республикасынын Эмгек, социалдык камсыздоо жана миграция министрлигинде Жогорку Кеңештин депутаты Г.А. Кожокулова баштаган мамлекеттик тил боюнча жумушчу топ менен жолугушуу болуп өттү.

Иш-чаранын алкагында министрликтин ишмердүүлүгүндө мамлекеттик тилди кеңири колдонуу жана өнүктүрүү маселелери талкууланды.

Эмгек министри Равшанбек Сабиров министрликте бардык документ жүгүртүү толугу менен мамлекеттик тилде жүргүзүлөрүн белгилеп, кызматкерлердин кесиптик чөйрөдө мамлекеттик тилди активдүү колдонушуна өзгөчө көңүл буруларын билдирди.

Ошондой эле министр "Мамлекеттик тил жөнүндө" мыйзамдын талаптарынын так аткарылышына министрлик тарабынан туруктуу көзөмөл жүргүзүлөрүн баса белгилеа, мамлекеттик тилдин конституциялык макамын чыңдоо жана өнүктүрүү боюнча министрлик ар тараптуу иштерди улантып жатканын кошумчалады.

Жолугушуунун жыйынтыгында мамлекеттик тилди расмий иш кагаздарында натыйжалуу колдонуу максатында ведомстволук терминологиялык сөздүк иштеп чыгуу сунушталды.

Бул сөздүк министрликтин документ жүгүртүүсүнүн сапатын жогорулатып, жарандар менен байланыштын натыйжалуулугун арттырууга өбөлгө түзмөкчү.