Кыргыз Республикасынын Президентинин «Улуттук дем — дүйнөлүк бийиктик» уңгужолу Жарлыгын ишке ашыруу алкагында 27-мартта Кыргыз Республикасынын Транспорт жана коммуникациялар министрлигинин жыйындар залында семинар өттү.

Иш-чарага министрдин биринчи орун басары Талантбек Солтобаев баштаган министрликтин түзүмдүк бөлүмдөрүнүн жетекчилери жана кызматкерлери катышты. Семинардын максаты – мамлекеттин өнүгүү багыттарын бекемдөө жана мекенчилдик идеясын күчөтүү.

Семинарды Мамлекеттик тил жана тил саясаты боюнча улуттук комиссиянын төрагасы, белгилүү кыргыз таануучу Мелис Мураталиев өтүп, «Улуттук дем — дүйнөлүк бийиктик» уңгужолунун негизги багыттарына токтолуп, бул концепциянын мамлекеттик органдар үчүн маанисин түшүндүрүп берди.

Баяндамада илим, билим жана маданият, мамлекеттик тил, экономика, айлана-чөйрө, социалдык мамилелер, дене тарбия жана спорт, дин, кыргыз жери жана кыргыз эли сыяктуу негизги багыттар талкууланды.

Ошондой эле, бул принциптерди транспорт жана байланыш тармагына шайкеш келтирүү, улуттук өнүгүү стратегиясына кошкон салымы жөнүндө да сөз козголду.

Семинар суроо-жооп форматында улантылып, катышуучулар уңгужолдун ишке ашырылышына тиешелүү суроолорун беришти. Министрлик өкүлдөрү улуттук идеяны транспорт жана коммуникация тармагында натыйжалуу ишке ашыруу боюнча ой-пикирлерин ортого салышты.

Бул иш-чара улуттук баалуулуктарды жана мекенчилдик духун жогорулатууга багытталган жолугушуулардын бири катары өткөрүлдү жана мамлекеттик кызматкерлерге улуттук дем менен дүйнөлүк бийиктикке умтулуу идеясынын маңызын тереңирээк түшүндүрүүгө өбөлгө түздү.