Жыл сайын 2-апрелде дүйнө жүзү боюнча Эл аралык балдар китептеринин күнү белгиленип, бул майрам балдар адабиятынын өнүгүшүнө, жаш муунду китеп окууга кызыктырууга жана руханий тарбия берүүгө багытталган. 

Ушул маанилүү күнгө карата бөбөктөр үчүн кыргыз тилинде жарык көргөн жаңы жомок китептердин бет ачары болуп өттү. Бул иш-чарада кичинекей окурмандар үчүн атайын даярдалган чыгармалар тааныштырылып, чакан көргөзмө уюштурулду. Жомок китептерди жазган белгилүү авторлор да жаш окурмандар менен жолугушуп, чыгармачылыгы тууралуу баяндап беришти.

Төмөндөгү авторлордун жаңы жомок китептери окурмандарга сунушталды:

Тоголок Молдо сыйлыгынын лауреаты, балдар жазуучусу, көп жылдан бери Улуттук жазуучулар союзун   жооптуу катчы болуп иштеген Жылдыз Акаеванын “Алатай” жомогу жана Кыргыз билим берүү академиясынын Мектепке чейинки жана башталгыч мектептик лабораториясынын ага илимий кызматкери, КРнын Президентине караштуу Мамлекеттик тил жана тил саясаты комиссиянын алдындагы Кыргыз энциклопедия жана терминалогия борборунун жетектөөчү илимий кызматкери, балдар жазуучусу Айдай Бекбоеванын “Алтынканат” жомогу.

Жомок – ар бир баланын руханий дүйнөсүнүн ажырагыс бөлүгү. Ал баланын аң-сезимин, ой жүгүртүүсүн, адеп-ахлагын, мекенчилдик сезимин тарбиялоодо маанилүү роль ойнойт. Кыргыз тилинде жазылган сапаттуу көркөм чыгармалардын жарык көрүшү жана алардын жайылтылышы – мамлекеттик тилди өнүктүрүүгө, эне тилин даңазалоого өбөлгө түзөт.

Мындай иш-чаралар бөбөктөрдү китеп окууга кызыктыруу, балдар адабиятын өнүктүрүү, кыргыз тилинде көркөм адабияттын баалуулугун арттыруу максатын көздөйт. Жаш муунга сапаттуу билим жана тарбия берүүдө мындай жомок китептер маанилүү каражат болуп саналат.

Авторлордун айтымында, бөбөктөргө жомок окуп берүү – алардын логикалык ой жүгүртүүсүн, тил байлыгын өнүктүрүүгө, эмоциялык дүйнөсүн калыптандырууга чоң таасир этет. Андыктан ата-энелерди жана мугалимдерди кыргыз тилиндеги жомок китептерин окутууга чакырабыз.

Бул иш-чара – балдар адабиятын өнүктүрүүгө жана эне тилибизди даңазалоого салым кошкон дагы бир чоң кадам болду.