2024-жылдын 24-июнунан баштап Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын Окуу-маалыматтык жана котормо борборунда  «Мектепке чейинки билим берүү уюмдарында мамлекеттик тилди үйрөнүүнүн инновациялык ыкмалары” аталышындагы 24 саат көлөмүндөгү квалификацияны жогорулатуу курсу  башталды.

Окуу-маалыматтык жана котормо борборунун директору Жумакадырова Карлыгач Мамбетжумаевна жана Бишкек шаарынын мэриясынын Мамлекеттик тилди өнүктүрүү бөлүмүнүн башчысы Ниязбекова Эльвира Керимовна курстун катышуучулары менен баарлашып, катышуучуларга ийгилик каалады. Окутууну Кыргыз-Түрк “Манас” университетинин улук окутуучусу Кулалиева Калия Одесовна келишимдин негизинде  өтүп баштады. 

Мамлекеттик тилди үйрөтүү бала бакчадан башталыш керек деген коомчулуктун пикиринен улам  атайын окутуу уюштурулуп, мугалимдерди жана тарбиячыларды методикалык жактан даярдоо үчүн Окуу-маалыматтык жана котормо  борбору атайын дасыккан мыкты окутуучуларды таап, окутууну уюштурууну колго алды.  

 Буга чейин да Бишкек шаарынын бала бакчаларындагы  тарбиячылар, мугалимдер үчүн  “Орус тилдүү мектепке чейинки билим берүү уюмдарында кыргыз тилинде окуу-тарбия ишин жүргүзүү  усулу” аталышындагы 2 айлык окуу курсу өткөрүлгөн. Курстун аягында сертификат менен кошо усулдук колдонмо да таратылган. 

Мамлекеттик тил жана тил саясаты боюнча улуттук комиссиянын тил саясатын жүргүзүүнүн негизги талабы катары Окуу-маалыматтык жана котормо борборунда мамлекеттик тилди окутуу жана методикасын жайылтуу мындан ары да улантылат.

Дареги: Ч. Айтматов проспекти 1/2

Телефон: (0312) 21-01-51,  0702393870